PEDRO MARTINO

PEDRO MARTINO

Restorán Naguar (Oviedo)

imagen decorativa

COCINERU ASTURIANU NACÍU N'UVIÉU, entama la so formación en materia de cocina y hostelería na Escuela Oficial de Santiago de Compostela nel añu 1989. Rematáu'l so procesu formativu, entama a trabayar como ayudante de cocina nel Hotel La Gruta d'Uviéu durante un añu. Ye ellí, onde recibe'l so primer gallardón como Meyor Cocineru Mozu del Añu n'Asturies. Nesi momentu preséntase-y la posibilidá de trabayar pal restorán Trascorrales, que tenía una estrella Michelin de la mano del prestixosu cocineru asturianu Fernando Martín. En Trascorrales, y como ayudante de cocina, desenvuelve'l llabor a lo llargo d'un añu, momentu nel que se tresllada al conocíu restorán uvieín Del Arco. Nesti últimu, trabaya durante dos años, primero como xefe de partida y posteriormente como xefe de cocina. Pa meyorar los sos conocimientos y reciclase en procesos más modernizaos acordies a la cocina d'esi momentu, pasa'l so primer stage, collaborando nel restorán Martín Berasategui, qu'actualmente atesora tres estrelles Michelin. Baxo la batuta de Martín actualiza los sos métodos durante un mes. Yá ye un afitáu cocineru, cuando lu fichen pol Hotel Palacio de Cutre, onde pue comenzar a diseñar, como xefe de cocina, los sos propios platos, con un estilu mui personal que ye la base de la so cocina actual. Apaez yá en numberoses revistes especializaes y ye reconocíu con gallardones de nivel autonómicu que respalden el so bon oficiu nos fogones. Otra vuelta, y nun intentu permanente de superación profesional, treslládase al Restorán Jean Luc Figueres, onde –de la mano del so titular- conoz los secretos de la repostería que nesi mesmu restorán diseña Jordi Butrón, y visita El Bulli, una referencia yá daquella. Esto márcalu profundamente na so conceición de la cocina, nuna llinia que yá nunca va abandonar. Incansable nel so enfotu por descubrir y meyorar, sigue otru stage formativu nel restorán las Rejas del chef Manolo de la Osa, que como bon manchegu, apórta-y la busca de los raigaños del tastu nel productu autóctonu. A los ventiséis años y yá reforciáu pol so reconocimientu profesional y el bagaxe formativu, entama singladura como propietariu y chef del so restorán El Cabroncín. Durante cinco años puxa por atopar y afitar, esi estilu propiu pol que ye conocíu na actualidá. Por treslláu del llocal, abre en Caces, cerca d'Uviéu, y diseña una nueva marca col mesmu equipu y el mesmu arte culinariu. Refunda El Cabroncín pero agora bautízalu como L’Alezna. Son cinco años de gloria nos que lu reconoccen con una estrella Michelin, dos Soles na Guía CAMPSA y entra na clasificación de los meyores 50 restoranes de España, ensin cuntar les reseñes recibíes en bien de medios de comunicación. Pedro Martino atropa dellos reconocimientos a lo llargo de la so carrera, ente los que rescamplen una estrella Michelin, dos Soles na Guía CAMPSA y ta clasificáu ente los meyores 50 restoranes d'España. Con Naguar llogró'l primer premiu del concursu nacional de Pinchos y Tapes de Valladolid, el primer premiu del concursu de Pinchos y Tapes d'Asturies, el primer premiu nel concursu de Pinchos d'Uviéu y el primer premiu del concursu Nacional de Pinchos Marineros de la ciudá de Noja.

 

Más info

 

www.naguar.es

 

© GSC

Entama

patrocinadores

collaboradores institucionales

provisores oficiales

collaboradores

mg.lab 2017