• INICIU
  • //
  • EL FESTIVAL
  • //
  • FERRAN ADRIà: "ALLUGO LA GASTRONOMíA ASTURIANA ENTE LES MáS IMPORTANTES QU’HAI NA ACTUALIDá"

Ferran Adrià: "Allugo la gastronomía asturiana ente les más importantes qu’hai na actualidá"

'CITA A CIEGAS' CON FERRAN ADRIÀ

GIJÓNSECOME. 25/10/2017

Ferran Adrià: "Allugo la gastronomía asturiana ente les más importantes qu’hai na actualidá"

Cesión de los materiales cortesía de: elBulliarchive. Copyright y fotógrafo de estos materiales: Francesc Guillamet Ferran y Pepo Segura.

Escribió Goya, nuna fras que naide nun fuera quien a descifrar del too, que’l suañu de la razón produz monstruos. El Bulli, el restorán dende’l que Ferran Adrià (L’Hospitalet de Llobregat, 1962) coprotagonizó la mayor revolución gastronómica del nuestru tiempu, llegó a convertise nún d’ellos. Yá-y lo alvirtiera una vegada’l so hermanu Albert: “Ferran, creemos un monstruu y va comenos”. Al final, el monstruu, peslláu dafechu en 2011, nun comió a naide, pero yera preciso adomar aquella caxa de Pandora de la vanguardia y la creatividá d’onde salió, ente otres munches coses, la famosa téunica de la deconstrucción. El resultáu del trabayu d’adomar el restorán consideráu a lo llargo de 5 años como’l meyor del mundu, ye El Bulli Foundation: un think tank gastronómicu empobináu a desarrollar (y caltener) los valores y l’espíritu del proyeutu orixinal. Ta prevista l’apertura en 2018. Amás, va facelo na cala Montjoi de Roses, el pequeñu requexu con forma de croissant dende’l que Ferran (col so sociu, Juli Soler, fináu llamentablemente en 2015) conquistó’l mundu.

 

CUERPU

¿Dalgo que nunca pueda faltar na nevera de la so casa?

Fruta y verdura fresco.

Nuna cena con amigos o familia, ¿quién cocina?

Davezu comemos nun restaurante, preferentemente unu de los d’el Barri, del mio hermanu Albert. Los otros díes, la mio muyer o yo cocinamos daqué cenciello.

¿Cuál ye l’últimu productu que descubrió?

Más qu’un productu, munchos productos d’una mesma familia, los cítricos que traxi de la güerta  del mio amigu Vicente Todolí. ¡Tien más de 600 variedaes increyíbles!

¿Cuida que la sociedá sabe comer bien, nel sen d’una manera saludable?

Dende va un par de décades, meyoróse muncho, cuido que cada vuelta nos decatamos más de la importancia de comer bien. D’otra miente, siempre podemos meyorar. Ye llamador, por exemplu, que tradicionalmente nes escueles se diera importancia al exerciciu físicu, unu de los dos pegoyos de la salú física y mental, y nun se reparara nel otru pegoyu, l’alimentación saludable.

¿Cómo definiría usté la gastronomía asturiana?

La gastronomía asturiana ye una simbiosis perfeuta ente la cocina tradicional y la cocina contemporánea. Allúgola ensin dulda nenguna ente una de les gastronomíes más importantes qu’hai na actualidá.

 

ALMA

¿Cuál ye’l meyor conseyu gastronómicu que-y dieron na vida?

“Nun hai comida raro, hai xente raro”.

¿Qué rasgos de la so personalidá tán más presentes na so cocina?

El riesgu.

 

¿Pa ónde va la gastronomía contemporánea?

Siempre ye difícil  señalar lo que nos va trayer el futuru, en gastronomía contemporánea tamién. Cuntamos, sicasí, con una baza increyíble: esta xeneración de cocineros y restauradores ye la más preparada y la más brillante que yo conociera, y paez que les xeneraciones futures vienen pisando bien fuerte.

¿Con qué personalidá/celebridá del mundu-y gustaría compartir una comida?

Con Picasso.

¿Cuáles son les circunstancies más estrañes en que cocinó?

Un día, tando de serviciu n’El Bulli, quedamos ensin lletricidá, y tuvimos que cocinar pa cincuenta persones con forniellos. Teniendo en cuenta que cada persona recibía ente venti y trenta ellaboraciones, cuando terminamos supimos que llográremos una verdadera fazaña.

 

MENTE

¿A usté conquístenlu pel estómagu?

Sí, ye una bona manera de conquistame...

¿Cuála ye la so primer alcordanza gastronómica?

La cocina de mio ma, dende llueu.

¿En qué detalles repara cuando entra nun restorán per primer vegada?

Depende con quién vaya, en qué circunstancia, etc. En realidá hai cientos de variables.

¿Cómo-y esplicaría usté l’alta cocina a un neñu/a?

De la mesma manera qu’a un neñu nun se-y enseña la lliteratura, sinón que lu encamentamos a que llea, cuido que na entruga que me facéis, la cosa entama enseñando a un neñu a comer bien, a comer sano, a comer variao, a reconocer los alimentos y a saber esfrutar de los meyores productos.

¿Un platu que lu encerrisque y tovía nun pudiera desarrollar?

El xeláu caliente.

 

BONUS TRACK

Una zuna personal…

Dende va unos años, nun llevar camisa enxamás.

Un deséu pal mundu…

Ye un deséu que quixera que nun fuera un imposible: el fin de la fame, de les guerres, de la infelicidá nel mundu.

Un viaxe pendiente…

Tasmania.

Una fras célebre o refrán que recuerde davezu…

Crear ye nun copiar.

Un conseyu pa la mocedá…

Que persigan los sos suaños, la so pasión, pero al tiempu que deprendan l’arte de la paciencia.

 

ENTRUGA A CIEGUES

La selmana pasada, Pep Palau dexónos la siguiente entruga pa usté: “¿Cuál ye l’alimentu que más valores?

El sal. Porque ensin ello la comida sedría otra cosa diferente dafechu.

Por favor, una entruga pal nuestru/a siguiente convidáu/ada:

¿Con cuántes personas crees que ye ideal dir a vivir una esperiencia gastronómica?

NEL PRÓXIMU CAPÍTULU CITA A CIEGUES CON MARTÍN BERASATEGUI

© GSC

Entama

patrocinadores

collaboradores institucionales

provisores oficiales

collaboradores

mg.lab 2017